Timo der Moerder...aehm nei Gaertner

Jetzt wo de Martin weg isch und en neue Volunteer (Collin, nomol en Ami) do isch, bin ich befoerderet worde (weiss noed oeb das s richtig Wort isch...). Jedefalls schaff ich ab sofort nuem i de Bar sondern im Garte. Das heisst, statt wie voher am halbi 8i afange und bis am 4i schaffe, gohts ez scho am 6i los, und hoert am 4i uf. Defuer hani ez glaub 2 Freitaeg statt nur 1. Ich mues aber nomol nofroege.
Was ich noch eim Tag im Garte scho weiss, isch dass d Bar en zimlich easy Job isch. Aber s Lebe isch halt kei Schoggi ;)
Am Vormittag hani am wohrschinlich schlimmschte Ort uf de ganze Farm agfange: Im Kompost. Das stinkt zum Teil erbaermlich!! Aber de Kompost bestoht ja us halb verrottetem Gruenzuegs und Pferdemist. Us dem Zuegs choent mer Biowaffe baue. Costa Rica chan froh sii, dass kei Erdoel hend, suess waer scho lang d USA iigfalle zum "Fride und Demokratie bringe".
Am Nomitag isches denn zum Glueck noed im Kompost witergange. Defuer hani oeppe 15 Quadratmeter oder meh muese umgrabe. Aber zum Glueck isch s Werkzueg so wahnsinnig usgriift....e ca. 6kg schweri Metallhacke, wo sich denn noch 3h Arbeit i de Sunne (es paar Wolke hets scho gha) oeppe 20kg schwer worde isch. Es isch eigentlich es Wunder dass ich das Mail no chan schriibe, will mini Haend sich afuehlet als waer en Traktor druebergfahre.
Aber ez isch gnueg gjammeret. S git ja schliesslich Muskle ;)