Abentuer im Urwald

Soo. Zweite und letschte Tag en Casa de Memo (o de su papa). Am Morge hemmer es paar Pflanze im Garte pflanzt, und hend denn au no Zuckerrohr probiert wos do aapflanzet. Da bisst mer es Stueckli ab und chaut druf ume damit de Saft usechunt. Mmmmmmm! Schmeckt sehr guet. (Suess halt ;) )

Am Nomitag sind mir denn go en Wasserfall aaluege. Zerscht sind mir (Memo,Yoyi,und ich) oeppe 15min mitm Bus de Berg deruf gfahre. Und vo det isches waehrend ca. 45min in Urwald inegange, bis mir bimne schoene Wasserfall acho sind. Denn simmer 50m de Bach abwaerts gange/kletteret bis zunnere Stell mit tuefem Wasser. Mir hend doet choene vo ca. 6m is Wasser gumpe. Chaaaalt!! Aber muy rico.
Nochher simmer denn nomol es wiili ueber Stock und Stei und Wasser kletteret, wobi ich han muese feststelle dass mini Schue noed wahnsinnig rutschfest sind. Ich hans aber verletzigsfrei ueberstande.

So jetzt muesi weg. Huet spilt Costa Rica contra los Gringos. Hoffentlich gwuent Costa Rica.