Ralphie the Caterpillar

Mini Dame und Herre, begruesset si bitte uf de Buehni, de groessti Hippie vo de noerdliche Hemmisphaere: Frederico aka Ralphie aka Sohn vom Scheff.
Uf de erst Blick gseeht er, ich saeg mol alternativ uus. Langi Locke und in so Meditationskleider gwicklet.
Uf de zweit Blick schiint er doch sehr gebildet. Er redet Spanisch, Englisch, Franzoesisch und glaub au chli Hebraeisch. Usserdem ischer in Belgie id Schuel gange.
Uf de dritti Blick ischer es fuuuuls Muettersoehnli (oder Vatersoehnli). Er laebt naemlich do uf de Ranch und tuet absolut uberhaupt gar nuuuuueeet. Er bildet sich aber trotzdem Managerkompetenze ii, und kontrolliert staendig d Receptionistinne. Die saeget aber, dass de einzig wo Fehler macht er isch.
Uf de viert Blick ischer denn wider de Hardcorehippie vom Dienst. Er verbringt sin Tag mit Yoga, Veggiepizza esse (echt ez, fascht jede Tag sone bloedi Veggiepizza. Das isch ja schlimmer als s alltaeglichi 2.50.- Migrossandwich waehrend de Kanti...),meditiere und philosophiere. Gescht hani erfahre, dass de im Ernst glaubt, dass Ende 2012 d Welt untergoht, will denn de Mayakalender ufhoert. Er tuet drumm flissig trainiere, damit er sich denn bi de Apokalypse chan in es Paralleluniversum ueberemeditiere. So han ich das jedefalls verstande...

Ah ja, mir Volunteers saeget ihm Ralphie (natuerlich noed direkt). Wiso?
Alli Fruend vo zeitgenoessischer, intellektuelle hochstehender Fernsehunterhaltig (Simpsons-Fans), kennet de Ralphie, de Sohn vom Chief Wiggum. Und de seit i einere Szene: When I grow up, I wanna be like my daddy. Or a caterpillar!

Mir findet, dass das Zitat gnausoguet au vo uesem Frederico choennt stamme ;). (Echt de Typ mues mer erlebt haa)